Traballando a comprensión das figuras literarias
Responder
Arquivos da etiqueta: interactivas
Para achegarse ao texto argumentativo (oral)
Para encamiñar a introdución (moi básica) ás características da argumentación, empregamos esta serie de actividades sobre un fragmento cinematográfico que inclúe tamén unha proposta de produción, só bosquexada.
Adaptamos tamén esta breve secuencia da Revista Escola deste xeito.
O vídeo co que se traballa no caderno interactivo é este de Ao cruzar o límite (o intercambio que interesa está ao final, desde o 7:40, mais é preciso contextualizalo):
Máis interactivos
Como xa comentei hai un tempo, as actividades interactivas na rede parécenme necesarias para a reflexión lingüística, a revisión ou o repaso de contidos, sobre todo se as orientamos a construír coñecemento. Outra cousa é cando se converten no centro da actividade dixital para potenciar o mecánico. E non é difícil atopar cada vez máis actividades para compartir, aínda que seguro que son máis as que fican pechadas nas aulas virtuais dos centros e de sitios como Edmodo (aquí non temos a opción de facelas públicas).
Se lles sumamos aos materiais de Rosa Salgueiro, Tintarrás, Correlingua e o Departamento de Lingua do IES Otero Pedrayo, xa ben difundidos, as múltiples actividades de Linguagalega.org, de Belén Pérez (sitio que, sorprendentemente, non vexo rexistrado noutros espazos de lingua) ou as de Enredando coas palabras (accesíbeis desde varias das etiquetas do blogue), temos un feixe xeitoso para diferentes niveis. Un caso curioso, válido só para moi determinados cursos e contextos, é o destes arquivos en flash, producidos hai uns anos e destinados aos Celgas.
Un par de notas que poden ser de interese a respecto das ferramentas. Estou a probar a versión gratuíta (15 días) de Quiz Builder e é excelente en canto ao manexo e aos resultados; velaquí un exempliño. Por outro lado, para a creación de exposicións e cuestionarios sobre vídeos, abriu recentemente esta aplicación de TED Ed que paga a pena explorar.
Punto de vista contrario
É evidente que as actividades interactivas xeralmente motivan o alumnado, e en Lingua e literatura parece que tamén o profesorado. A verdade é que, aínda traballando con procesos de produción, ao desenvolvérmolos na rede non está de máis incluír algunhas destas actividades para axudar a reflexionar, a recompoñer ou a revisar o feito.
Para crealas, son moitas as opcións dentro das ferramentas de autor e dos xeradores online, mais tamén teñen todas estas moitos condicionantes: espazo limitado, deseño predeterminado, etc. Por iso, mergullamos nos plugins de wordpress para buscar alternativas máis flexíbeis dentro do formato blogue, e demos con algunha. Como Quizzin, que permite confeccionar diferentes baterías de cuestións para a escolla da resposta correcta e ofrece ao final a avaliación. Hai, iso si, que corrixir un erro importante no código, pois do contrario ao avanzar sen responder mostra a solución e non computa como erro. Cómpre engadir no .js este fragmento marcado.
Velaquí unha produción nosa cunha serie de actividades sobre a postura contraria dentro dunha secuencia con textos argumentativos.
