Remexer Na Lingua

Seguimos ollando atrás (e un pouco o embigo colectivo) para pechar o curso con este mapa -despregábel- da nosa experiencia.

É hora de facer memoria avaliadora do labor realizado, tamén do dixital, claro. E, en coherencia coa cultura do intercambio que aquí sempre apoiamos, parece conveniente (outra cousa é que sexa útil) facer públicas algunhas notas referentes á nosa experiencia nunha rede social en Ning.

En primeiro lugar, é preciso tomar en conta as necesidades educativas que quixemos enfrontar e, en consecuencia, os obxectivos que perseguimos. Tamén para deixar claro que a elección dun espazo deste tipo non respondeu a un prurito innovador, nin moito menos a unha suposta pretensión de superar a ferramenta blogue (á que nós non lle tiramos suficiente partido nin chegamos a arrombar: non deixamos de publicar alí producións). De feito, entendemos estas dúas posibilidades, rede social e blogue, como complementarias respondendo a obxectivos en boa parte distintos, por máis que consideremos oportunas estas razóns en defensa da segunda.

O noso contexto de notábel desgaleguización e as consecuentes escasas competencias activas en galego do alumnado, a falta de hábito de revisión das producións, os problemas á hora de traballar con borradores (que acababan sendo publicados) no blogue, a dificultade para seguir proxectos de traballo na rede ao dispoñermos só dunha sesión á semana (no mellor dos casos) con computadores, entre outras razóns, foron decisivas para a escolla dun obradoiro en comunidade neste último trimestre.

Procuramos, logo, aproveitar unha contorna de traballo en interacción, segundo os parámetros presentados no documento dunha entrada anterior, orientados sempre por:

• a proxección á lingua galega dos valores positivos asociados aos usos na rede;
• o acceso modelador ás nosas producións culturais máis innovadoras;
• a integración dos xéneros dixitais propios, extraescolares, do alumnado para reorientar os usos irreflexivos e consumistas e tamén como porta de acceso a outros xéneros máis elaborados;
• a socialización formativa, a partilla e a suma de experiencias;
• o desenvolvemento de procesos en continua revisión.

No que atinxe á motivación do alumnado, a resposta deste foi, en xeral, moi boa, tanto no que se refire á predisposición como á implicación. Unha moi pequena parte experimentou co espazo, pero non chegou a construír contidos; a maioría abordou tarefas de certa complexidade -nalgúns casos, con moi bos resultados- e inseriu artigos persoais, ademais de intercambiarse infinidade de mensaxes, mesmo desde fóra do centro e máis alá do horario escolar, desenvolvendo tamén neses casos hábitos e competencias en galego o alumnado castelán falante.

Unha experiencia, polo tanto, que pretendemos que teña continuidade, tamén para mellorar a organización e as propostas.

Outra moi distinta, mais igualmente en Ning e con participación do alumnado, é esta.

ENGADIDO

Para quen tiver interese en experimentar con guía, estes excelentes titoriais elaborados por António Teixeira.

Aquí, a nosa memoria.

Recitado e ilustración de catro poemas de Canle segredo, de Xosé María Álvarez Blázquez, por parte do alumnado de 3º ESO.

ENGADIDO. En Primaria e cun coidado exquisito, o CEIP Quintela de Moaña confeccionou estes videopoemas.

Boa parte dos recursos presentes ultimamente neste blogue, e outros non referenciados, coma esta actividade de comprensión dunha entrevista audiovisual, sustentan as tarefas con material auténtico e enfocadas á produción textual que lle propoño ao alumnado na rede social (sociedade limitada, iso si) Obradoiro. Dez tarefas con certa complexidade sobre a prensa, o cine e a literatura que visan desenvolver integradamente competencias, nunha liña un pouco distinta aos proxectos en cadernos interactivos que seguimos ata agora. Están accesíbeis na portada, non así o traballo do alumnado, posto que se trata tamén de aprender a reformular e puír na rede procesos, en especial textos, e os resultados só pasan a ser públicos (en Dis ti!) unha vez que se revisaron suficientemente. Cando, ao remate do curso, se poida falar realmente dunha experiencia (curta), comentarei como se desenvolveu a cousa.

Para o traballo na rede do cine e a linguaxe audiovisual, o alumnado pode manexar (ver e rever, escolmar, capturar e integrar en presentacións, etc.) curtas accesíbeis e con suficiente calidade. Velaquí a nosa escolma:

O amigo Delmiro

Cores

A contratempo

Premio

A miopía

Nico.avi

Auga

Estamos comezando a colgar no blogue da aula algúns dos resultados dun pequeno obradoiro de creación poética organizado en conexión coa lectura interpretativa de textos representativos das grandes temáticas dos distintos períodos históricos que temos que abordar en 3º da ESO. Foi, con diferenza, a actividade (a serie de actividades) máis motivadora para o alumnado, e agora cómpre facer públicos os textos con suficiente valor. Aínda que o tempo non deu máis que para subir un miudallo, están no forno moitos versos impacientes.

Aproveitamos para probar con Issuu, unha ferramenta que, malia estar incluída na escolma inicial de ´agorarede, aínda non empregaramos. O feito de xogar con imaxes de textos -no caso dos caligramas- fixo que se preferise sobre outras opcións como Slideshare. E resulta ben funcional Issuu: só precisamos preparar un pdf, subilo e e dispoñemos dun libro en flash moi manexábel case ao instante.

ENGADIDO. Obradoiro 2, con ZohoShow:

Con SplashCast (música de Fanny e Alexander):

Non é a primeira vez que comentamos entre colegas o feito de que hai unha enorme oferta de ferramentas na rede para o ensino e que o principal é facer unha boa escolla, e non querer xogar con todas, cousa imposíbel ademais. Mais un anda á procura das que, sendo funcionais e atractivas, non nos compliquen moito a vida. Por iso, estou a integrar no traballo o eXe eLearning (véxase o artigo correspondente de ensinolgl, blogue de apoio ao labor colectivo que estamos a iniciar nun PFAC no centro) e mais o Scratch.
O eXe é unha ferramenta moi doada de empregar e, ademais, adaptábel ás nosas necesidades se temos algúns coñecementos de html. Ten pouca variedade de actividades, si, mais ao seren deseñadas estas con procesadores de texto e exportarse o resultado como páxina web, podemos incluír calquera complemento que precisemos. Unha das actividades que realicei, sinxeliña, é esta sobre unidades e funcións oracionais.
O Scratch está pensado máis ben para que o alumnado, xa na Primaria, programe el mesmo animacións, pois é moi intuitivo. E ten moitas máis potencialidades para as matemáticas e disciplinas que xogan con conceptos espaciais. En calquera caso, non está mal para animar historias e facer presentacións. Isto último foi o que pretendín con esta centrada no xénero da entrevista (dura uns 10 minutos; en Firefox e en IExplorer funciona, en Flock parece que non). Como se ve, pódese aloxar na propia páxina de Scratch -tamén, conseguindo un applet, en calquera outra páxina- e, se un se inscribe, pódense baixar os proxectos que queiramos e fedellar neles para ver como foron construídos (esa é a mellor guía) ou modificalos (están baixo Creative Commons, iso si).

Aínda que están destinadas a ser só unha parte dun proceso secuencial con múltiples actividades sobre a prensa co que comezaremos en breve nas aulas, pareceume axeitado facerlles un sitio aquí por separado a estas dúas presentacións con certa interactividade: O papel social dos medios e Os xéneros xornalísticos. Foron realizadas con AnFX.

ENGADIDO. Pódese ver aquí o noso quiosco (accédese á páxina de cada un dos medios).